Adduri da' terra mia
di Caterina Zappia
Versi in vernacolo calabrese Jonico

Chist’ossa diventanu catini
sutta a ‘nu suli chi no’ scarfa,
sutta a’ ‘na luna di lacrimi amari
supra ‘sta terra chi chjiama fami.

Eccu li vidi’ ‘nto mari ‘ntempesta
’na pegli chi non sapi scasari
trema lu sciondulu non dassa nenti
l’occhji su’ vitri si specchjia lu mari.

Omini suli e senza distinu
mori lu jornu s’annega la sira,
sarza lu ventu si chjiama la pena
’nta chistu mundu chi pari galera .

E mancu sacciu chi passa glia intra
a undi lu ‘mpernu arriva ‘i matina,
ma servu diventa ‘sta trubula rrina
schijatta ‘u penzeru, e lava li mani.

Apriti mundu e sparti ‘stu pani
annetta lu sangu e caccia li spini,
fidili ‘ndi dassi sulu lu cani
ndabbaia sempri cu’ l’ossu ‘ i spartiri.

E cu’ ‘sti vrazza scorgiu ‘na ngagghia
sutta a ‘stu celu chi sangu chijovi
e si bagna sulu di caja e cundanna
vidi lu mari agghijuttiri li nomi.

Batti forti 'u cori nta 'stu pettu
sentu ca mi faci troppu mali
quandu penzu ca perdia a casa mia
e tutti i me ricordi cchjiu cari.
'Sta casa era tuttu chi 'ndavia
c'era 'u profumu i mia chi sazziava
eu staiu mali i mi ricordi i tia
si apria 'u cori quandu ti guardava.
'A me casa parrava comu a mmia
sempri mi dicia ti vogghjiu beni
eu era tuttu chigliu chi 'ndavia
pecchì sapia lejri li so' peni.
Tindijsti e mancu sacciu comu
pa' 'na manu crudeli e senza stima
chi 'nu jornu ti sutterau di focu
e vendetta gridau cchju di prima.
T'accarizzu ora comu 'na cotrara
ogni jornu mi giru e penzu a ttia
ciangiunu l'occhji 'i 'sta rovina amara
chi lacrimi ndannu sulu pa' ttia.
Ora 'u doluri si faci cchiju fortti
pecchì dassasti 'nta n'angulu amaru
me' patri, me mamma forzi su' fortti
ma vecchji lu focu a casa dassaru.

’U penzeru du’ poeta sapi ‘i sfurtuna
di ‘na vita chi passa e chi non canta
spetta lu tramuntu cu’ la pena
ma ‘na stiglia è ‘i ‘na vina vera.
Canta stancu tuttu ‘u so’ amuri
e solitariu si cunfundi e campa
sutta a ‘na campana chi sona appena
esti chi macchjia lu fogghjiu ijancu.
Scrivi penzeri chi sannu ‘i nostargia
attri vecchi ricordi di quandu cotraru
quandu i capiglji jianchi no’ ndavia
ora passa lu tempu e s’incanta paru.
Duci faci melodia comu ‘nu zitu
e canta davanti duvirusu a serenata
attaccatu comu palu alla sipala
e canta paroli di ‘na vita ‘ngrata.
Tristezza veni e no’ ndaviri fini
cercami e mentimi li catini,
comu trenu chi frischia a ferruvia
accussì penzeru meu veni.
Lacrimi teni intra l’occhji sperduti
non trova paci e si riduci a nenti
penzeru cca si ferma ‘u to’ domani
nta ‘stu prisenti vacanti chi senti.
Stringi la menti attacca cu’ li mani
e tingi cu la pinna stringi li denti
e curri penzuru e fammi trovari
domani lu suli risplendenti.
Veni assettati cu mia
sutta a ‘sta luna chi non dici nenti
supra a ‘sta terra chi non ndavi padruni
e curri penzeru meu tra la genti.
Penzeru dassami ancora nu’ minutu
guardu ‘stu mari chi sapi di silenziu
’sta terra chi non voli cchjiu parrari
e tu rimani penzeru meu cu’ nenti.
E ora prega cu mia penzeru novu
davanti a chistu artari e a chista cruci
davanti a chistu mundu chi non trova
assitatu comu è, voli la paci.