Batti forti 'u cori nta 'stu pettu
sentu ca mi faci troppu mali
quandu penzu ca perdia a casa mia
e tutti i me ricordi cchjiu cari.
'Sta casa era tuttu chi 'ndavia
c'era 'u profumu i mia chi sazziava
eu staiu mali i mi ricordi i tia
si apria 'u cori quandu ti guardava.
'A me casa parrava comu a mmia
sempri mi dicia ti vogghjiu beni
eu era tuttu chigliu chi 'ndavia
pecchì sapia lejri li so' peni.
Tindijsti e mancu sacciu comu
pa' 'na manu crudeli e senza stima
chi 'nu jornu ti sutterau di focu
e vendetta gridau cchju di prima.
T'accarizzu ora comu 'na cotrara
ogni jornu mi giru e penzu a ttia
ciangiunu l'occhji 'i 'sta rovina amara
chi lacrimi ndannu sulu pa' ttia.
Ora 'u doluri si faci cchiju fortti
pecchì dassasti 'nta n'angulu amaru
me' patri, me mamma forzi su' fortti
ma vecchji lu focu a casa dassaru. |
|
|
|
’A sira quandu ‘u celu stellatu
parra a luna supra a lu munti
sugnu stanca e penzu a ‘na vota
i figghji chi jiocavanu ‘ntundu.
Ora sunnu luntani a Milanu
luntani da stu cori niru e fundu
’nta ‘stu mundu cangiatu a ‘na vota
cchjiu no’ si canusci drittu cu tundu.
Ora fazzu ‘na telefunata...
e ci dicu ca nui comu du’ scemi
lu jornu cu la vucca serrata
sentimu a malincunia chi ndi veni.
Menu mali ca ndavimu a vostru frati
chi cu’ l’occhji simina allegria
se no cu’ ‘stu telefunu chi ndaiu
lu facia ‘u s’inventa ‘na magia.
Non ricordu chi ndaiu u vi dicu
’stu silenziu jinchiu ‘ste ‘mozioni
e quandu sentu a vuci chi ‘ntona
MAMMA! mi leva di ‘sta prigioni. |
|
|
|
Ti ficiru comu maccaturi sgarratu
manica 'i camisa chi manca 'nu buttuni
'na spera i suli cu' l'anima cangiata
nu filu 'i lana chi liga lu mattuni.
Ti ficiru comu 'na faccia stracangiata
comu lampu senza luci e senza sonu
comu l'acqua trubula a mezzu 'a via
e la siti 'a l'occhji, 'i quantu si' malata.
Si' cunzumata e senza hiatu ti movi
si' 'na carretta chi tira malandata
seggia 'i pagghjia chi finisci glia nterra
rutti li pedi e la corda svasata.
Ti 'ngissanu e ti fannu hjiastimari
ti jettanu comu mundizza a undi vonnu
comu (differenziata), 'nu miraculu, nu' sognu
ti dassanu comu calandreglia nta la strata.
'Na brutta vita esti a tua, si comu 'nu desertu
luntanu 'i tuttu si propriu rovinata,
'nta stu suli chi t'incanta comu mamma
quandu cottia 'a terra e 'nzuppa la iornata.
Non poi cchjiu, diventasti vecchia e gobba
gliarretu a chiglia pergula 'i racina
ndavi li cotrari chi iocanu a speranza.
Non vidi chi po' fari stamatina?
Si pezzu ' i cori, u sangu rigugghji nta li vini
e nta nu fazzolettu lacrima ti ricogghjiu,
comu 'na rosiceglia 'nta lu pettu,
veni, t'aspettu
comu na navi randi 'nta lu portu. |
|
|
|
|
Caterina è nata a Parigi, fra il profumo di cioccolato amaro e la musica di Édith Piaf .Scrive poesie fin dalla sua tenera età. Scrive versi perchè sono loro a farla sentire viva ed amata, sono frammenti di se, di giorni passati, frammenti di sogni e di ricordi che si annidano nella sua anima.
La tristezza, la solitudine , il dolore come parti integranti della vita, sono i temi predominanti delle sue liriche,, che sa comporre anche in vernacolo.
"Se qualcuno cercasse
di capire il tuo sguardo
Poeta difenditi con ferocia:
il tuo sguardo son cento sguardi
che ahimè ti hanno guardato
tremando." Alda Merini |
|